هل ماجستير إدارة الأعمال MBA مفيد؟

  • هي الMBA بتفيد في ايه؟
  • عايز اجابة قصيرة واللا تفصيلية؟
  • قصيرة المرة دي
  • بتفتح لك مواضيع البيزنس اللي انت عارفها وعايشها، وتشاور لك على الحاجات اللي ح تحتاجها في شغلك، وتعلمك مصطلحاتها، وتديك ملخص عملي ليها، وتعرفك ح تحتاجها في اي مواقف، فيبقى من السهل عليك تبحث عنها وتتعلمها بتفاصيلها وتمارسها لما تحتاجها. بتفتح لك مجال التعلم.. وبتكتسب صداقات وعلاقات ممكن تفيدك بعد كده بشكل كبير.
  • ممكن ادرسها وما تفيدنيش؟
  • لو ما جربتش البيزنس قبلها اصلا، ولو بعدها ما بحثتش واتعلمت (اعتمادا على انك درستها وخلاص) ولا مارست (عشان مافيش وقت)، كده غالبا مش ح تكون مفيدة ليك.
  • امتى آخد الMBA؟
  • ما دمت بتسأل السؤال ده يبقى مش دلوقتي.
  • ؟؟
  • عشان تاخد الMBA لازم تكون محتاجها، احنا بنتكلم عن وقت وفلوس، وبنتكلم عن معلومات نظرية وعملية محتاجة خلفية مسبقة، وبنتكلم عن ممارسة على طول، فانت اول ما تحتاج الMBA بجد ح تعرف.
  • الاماكن اللي يتدرسها بتفرق عن بعض؟
  • طبعا.. بس ممكن يتعوض الفرق..
  • بتفرق في ايه؟
  • في الدكاترة أقويا ولهم خبرة عملية في مجالاتهم واللا لا (النظريين مش ح يفرقوا عن اي كورس عادي)، والكتب/المناهج اللي الدكاترة بيقرروها حديثة وشاملة واللا لأ، وطريقة التدريس فيها عملي تطبيقي واللا لأ، وطبيعة الطلبة لهم خبرة في مجالات متنوعة في البيزنس واللا لأ (الاحتكاك بيفرق وبيعلم جدا)، وساعات الدراسة كافية واللا لأ.. وشهادتها معترف بيها واللا لأ (لو ح تحتاجها في شغل أو حاجة)..
  • ازاي ممكن يتعوض الفرق؟
  • بإجابة السؤال الأول، بعد ما بتعرف عناوين المواضيع في المجال فكل ما اتعلمت عنه اكتر بنفسك اثناء الدراسة وبعد الدراسة ومارست اللي اتعملته ده مش ح يفرق انت دارس فين..
  • هل ممكن اتعلمها انا لوحدي من غير دراسة نظامية؟
  • جدا، بشرط تعرف الاول المجالات ومواضيعها وبعد كده تبدأ تتعلمها، ح تحتاج لازم حد متخصص يشاور لك على الحاجات دي، سواء وجها لوجه او في فيديو او في كتاب، المهم حد فاهم وعارف ربطة الحاجات النظري دي بالواقع العملي. ولما تشوف مصدر للتعلم بعد كده لازم يكون بيوضح الجانب التطبيقي لكل حاجة.


يسعدنا أن نقدم لك في "خضر و بزنس" كل العون الذي تحتاجه إن شاء الله، لدينا نوعان من الخدمات:

  1. خدمات النصح والتوجيه المجانية للشركات الصغيرة والمبتدئة، يكون التواصل عبر الإيميل وواتس أب، وعادة لا تحتاج الاستشارات في هذه المراحل إلى وقت طويل لتقديمها.
  2. الاستشارات المدفوعة في مجالات البزنس المتنوعة، يشمل ذلك الاستثمار وإنشاء الشركات وتقييم الشركات والإدارة العامة والإدارة المالية والامتياز التجاري والتسويق وريادة الأعمال، وهذه الخدمة مناسبة للشركات المتوسطة والكبيرة والشركات الريادية الناشئة التي حصلت على تمويل وكذلك للمديرين الراغبين في التطور والتحقق من خطواتهم.

د. محمد حسام خضر خبير الإدارة والاستثمار ومؤلف كتاب "رائد الأعمال Inside Out"، أسس العديد من الشركات في مجالات مختلفة، منها إنترنت بلس وبنت الحلال وفتكات وكاوباي وخضر و بزنس، ويعمل مستشارا دائما لدى العديد من الشركات التقليدية والريادية.


شارك الموضوع
FacebookLinkedInYouTube